Diploma lefel 3 Tillhill mewn Coedwigaeth a Choedyddiaeth

Mae’r Diploma Tilhill mewn Coedwigaeth a Choedyddiaeth yn rhan o bartneriaeth unigryw rhwng Coleg Cambria Llysfasi a Tilhill Forestry, y cwmni mwyaf o ran rheoli coedwigaeth a choetiroedd yn y Deyrnas Unedig. Wedi ei ddylunio’n arbennig i’ch paratoi chi ar gyfer gyrfa lwyddiannus mewn coedwigaeth, bydd y cwrs hwn yn eich paratoi chi ar gyfer y diwydiant ac wedi’ch hyffordd i gael cyflogaeth.

Ym myd uwch-dechnoleg modern coedwigaeth, mae gwybodaeth am goed wrth galon yr hyn a wnawn, boed hynny’n goedwigaeth fasnachol neu’n rheoli coetiroedd. Byddwn yn eich tywys trwy’r agweddau technegol o adnabod gwahanol rywogaethau, i’r gwyddor o sut maen nhw’n gweithio, o sefydlu coed, gofalu amdanynt a’u diogelu rhag plâu ac afiechydon, i reoli coed ar gyfer cynhyrchu, cadwraeth ac amwynder, hyd at y cwympo terfynol, cywain a phrosesu pren. Byddwch yn dysgu sut i weithredu’r offer, cyfarpar a pheiriannau angenrheidiol i weithio yn y diwydiant modern a chyffrous hwn, gan gynnwys llifau cadwyn, naddwyr coed, tractorau, sgidwyr ac anfonwyr.

Byddwch yn gweithio i safonau diwydiant drwyddi draw, ac yn meithrin a datblygu sgiliau ymarferol, yn ogystal ȃ deall materion damcaniaethol yn y diwydiant. Ceir cryn bwyslais ar waith ymarferol yn y cwrs, gyda digonedd o gyfle i fod yn weithredol ac yn agos at goed. Mae tripiau addysgol i Tilhill Forestry a safleoedd BSW trwy gydol y gadwyn gyflenwi yn cynnig cyfleoedd dysgu ychwanegol ar safleoedd masnachol sy’n cynnwys ymweliadau, sesiynau ymarferol a phrofiad gwaith ar safle. Mae ein cysylltiadau agos â diwydiant yn cynnig sefyllfaoedd gwaith go iawn i fyfyrwyr, ynghyd â chyfnodau lleoliadau gwaith sylweddol, a byddwch yn cael yr holl brofiad sydd arnoch ei angen i gael cychwyn da yn eich swydd gyntaf.

I ategu’r prif gwrs, cynigir ystod o gymwysterau ychwanegol (gyda chost) fel llifiau cadwyn, cwadiau ATV, torwyr prysgoed, sglodwyr coed, chwistrellu plaladdwyr a gyrru tractorau.

Byddwch hefyd yn cael cyfle i weithio ar brosiectau cymunedol, a gweithgareddau eraill, yn ogystal â’ch prosiect unigol eich hun, wrth weithio tuag at gwblhau Bagloriaeth Cymru Uwch.