C&G Lefel 3 Diploma Technegol Uwch mewn Blodeuwriaeth

Dyma gwrs rhan-amser sy’n cael ei gynnal dros ddwy flynedd academaidd (64 wythnos) am un diwrnod yr wythnos. Agored i bob dysgwr sy’n meddu ar Dystysgrif Dechnegol/Diploma Lefel 2 mewn Blodeuwriaeth ac mae wedi’i lunio ar gyfer y rhai sydd eisiau ennill y cymhwyster lefel nesaf wrth weithio/cydbwyso bywyd gartref.

Mae'r cwrs hwn yn rhoi dealltwriaeth fanwl o’r diwydiant blodeuwriaeth, gan ddatblygu eich sgiliau, eich gwybodaeth a'ch profiad ar lefel uwch er mwyn cael gwaith sy’n gysylltiedig â blodeuwriaeth a'ch ymestyn tuag at swydd a chyfrifoldebau ar lefel uwch ym myd Busnes Blodeuwriaeth.

Byddwch yn cymryd rhan mewn creu dyluniadau ar gyfer digwyddiadau a phriodasau, arddangosiadau cyhoeddus ac ar gyfer gwerthiannau masnachol.

Byddwch yn astudio ystod eang o bynciau sy’n ymwneud â blodeuwriaeth, gan gynnwys proses dylunio creadigol, gofal planhigion a blodau, dyluniadau blodau wedi'u clymu, dyluniadau blodau mewn cyfrwng, dyluniadau blodau â gwifrau ac wedi’u gludo, rheoli busnes a marchnata, iechyd a diogelwch, tueddiadau yn y diwydiant blodeuwriaeth a blodeuwriaeth digwyddiadau.

Byddwch yn cael y cyfle anhygoel i elwa ar gymryd rhan mewn amrywiaeth o brosiectau blodeuwriaeth heriol, fel priodasau bywyd go iawn o'r dechrau i'r diwedd, a chynllunio dyluniadau arloesol sy'n gweddu i'r briodferch. Byddwch hefyd yn cynllunio a chynnal arddangosiadau cyhoeddus ac yn cael y cyfle i gymryd rhan mewn cystadlaethau clodfawr fel Cystadleuaeth Sgiliau’r Deyrnas Unedig.

Bydd y cyfleusterau gwych a’r staff arbenigol brwdfrydig yn rhoi hwb i chi yn eich llwybr gyrfa dewisol. Bydd dysgu mor hwyliog â phosibl, a byddwch yn dysgu trwy amrywiaeth o ddulliau gan gynnwys darlithoedd, gwaith unigol ac mewn grwpiau, gwaith ymarferol yn ogystal â defnyddio ystod o dechnoleg dysgu fodern.

Mae Saesneg a Mathemateg yn rhan hanfodol o’r rhaglen. Byddwn yn gweithio gyda chi i wella eich sgiliau llythrennedd a rhifedd ac yn rhoi cyfle i chi ddatblygu eich sgiliau llythrennedd digidol. Bydd gofyn i chi fynd i’r coleg mewn blociau o ddau ddiwrnod i gwblhau asesiadau drwy gydol y ddwy flynedd. Bydd y tiwtor yn sicrhau bod gennych chi’r dyddiadau hyn mewn digon o bryd ac nad ydyn nhw’n cyd-fynd â’r cyfnodau prysur yn y diwydiant.

Mae disgwyl y bydd gennych chi eich offer Blodeuwriaeth eich hunain a byddwch yn dod â nhw gyda chi bob wythnos.