Diploma Lefel 3 VTCT mewn Therapi Harddwch Cyffredinol

Prif ganlyniad Diploma NVQ Lefel 3 VTCT mewn Therapi Harddwch Cyffredinol yw cadarnhau eich gallu mewn swydd therapydd harddwch. Mae'r holl unedau yn y cymhwyster hwn yn ymwneud yn uniongyrchol â swydd benodol therapydd harddwch.
Trosolwg
Mae’r Diploma NVQ Lefel 3 VTCT mewn Therapi Harddwch yn gymhwyster galwedigaethol sylweddol a fydd yn cadarnhau eich cymhwysedd fel therapydd harddwch. Mae’r cymhwyster yn rhan o fframwaith brentisiaeth, fodd bynnag mae’n cael ei gynnig hefyd ar wahân i brentisiaethau gan ddarparwyr addysg a hyfforddiant sy’n gallu cynnig y cwrs hwn mewn amgylchedd salon go iawn, ac yn gallu darparu’r cyfle i chi ddysgu sgiliau therapi harddwch a gweithio gyda chleientiaid go iawn. Mae’n bwysig eich bod yn cael cyfle i ddysgu mewn amgylchedd gwaith go iawn, yn enwedig gan fod y cymhwyster hwn yn arwain at weithio mewn sector sy’n canolbwyntio ar gleientiaid a darparu gwasanaeth.

Mae’r cymhwyster hwn wedi ei lunio i ddysgwyr 16 oed neu hŷn, a bydd yn eich cynorthwyo i gael cyflogaeth fel therapydd harddwch, gan fod unedau’r cymhwyster hwn yn ymdrin â’r holl sgiliau a gwybodaeth a fydd eu hangen ar gyfer y swydd hon. Gallwch ddechrau ar y cwrs os ydych wedi cyflawni cymhwyster Lefel 2 mewn therapi harddwch yn y gorffennol a/neu brawf sgiliau a chyfweliad llwyddiannus.

Dyma gymhwyster galwedigaethol sy’n cynnwys yr holl elfennau sydd eu hangen i weithio’n effeithiol fel therapydd harddwch, gan gynnwys unedau gorfodol sy’n cwmpasu’r canlynol: triniaethau trydanol y wyneb a’r corff, tylino’r corff, diflewio trydanol, monitro dulliau gweithredu yn y salon a chyfrannu at ddigwyddiad hyrwyddo.

Byddwch hefyd yn cael y cyfle i feithrin eich dealltwriaeth a’ch sgiliau ymhellach drwy ddewis nifer o unedau arbenigol dewisol, sy’n cynnwys: gwasanaethau colur brwsh aer, cwyro mannau preifat y corff, estyniadau sengl blew’r amrannau, lliw haul UV, rhoi lliw haul ffug ar eich hun, tylino gydag olewau wedi'u cymysgu'n barod, tylino pen Indiaidd a therapi cerrig. Mae strwythur y cymhwyster hwn yn rhoi’r cyfle i chi feithrin y wybodaeth, y ddealltwriaeth a’r sgiliau sydd eu hangen ar gyfer gyrfa fel therapydd harddwch.

Trwy gydol y cymhwyster hwn, byddwch yn cynyddu eich gwybodaeth a’ch dealltwriaeth o’r anatomi a ffisioleg berthnasol, iechyd a diogelwch, a gofal cleientiaid. Byddwch hefyd yn meithrin ystod o sgiliau technegol wrth baratoi’r croen, gosod cynnyrch therapydd harddwch ac offer trydanol ar y croen, gan ddefnyddio amrywiaeth o dechnegau gwahanol. Byddwch yn meithrin sgiliau rhyngbersonol hefyd, a fydd yn eich galluogi chi i gyfathrebu’n effeithiol gyda chleientiaid.