Diploma lefel 3 mewn Rheoli Cefn Gwlad a Bywyd Gwyllt

Mae deall sut mae cefn gwlad yn gweithio, cynnal y dirwedd, ei amrywiaeth o rywogaethau a chynefinoedd yn ganolog i reolaeth cefn gwlad. Os ydych yn mwynhau bod yn yr awyr agored, ddim yn malio baeddu eich dwylo, ac yn ymddiddori mewn bywyd gwyllt, cadwraeth, hamdden awyr agored, sgiliau gwledig neu reoli helfeydd, efallai mai dyma’r union gwrs i chi.

Byddwch yn dysgu am wahanol gynefinoedd, fel coetir, gwlyptir, rhostir, glaswelltir, a’r rhywogaethau sy’n byw ynddynt; am brosesau naturiol a’r ecosystemau a gynhelir ganddynt, a sut mae’r rhain yn cynnal pob bywyd yn y pen draw. Byddwch yn dysgu sgiliau newydd, o ffensio a phlygu gwrychoedd, i reoli coetir, bondoncio, plannu a thorri coed, gweithredu a chynnal a chadw peiriannau gan gynnwys tractorau, llifau cadwyn, torwyr prysgwydd, cerbydau pob tir (ATV) a rhagor na hynny.

Trwy gydol y cwrs, byddwch yn gweithio tuag at safonau diwydiant ac yn dysgu a meithrin sgiliau ymarferol, yn ogystal â dod i ddeall materion damcaniaethol y diwydiant. Ceir cryn bwyslais ar waith ymarferol, a chewch ddigon o gyfle i wneud gwaith ymarferol ac yn agos at goed. Mae teithiau addysgol yn rhan bwysig o’r cwrs, ac maent yn gyfleoedd dysgu ychwanegol, trwy ymweliadau a sesiynau ymarferol. Mae cysylltiadau agos â diwydiant yn cynnig sefyllfaoedd gwaith go iawn i chi fel dysgwr, ynghyd â chyfnodau lleoliad gwaith sylweddol, a byddwch yn cael yr holl brofiad sydd arnoch ei angen i gael mantais wrth ddechrau yn eich swydd gyntaf.

I gyd-fynd â'r prif gwrs, mae modd astudio amrywiaeth o gymwysterau ychwanegol (am gost) megis defnyddio llifiau cadwyn, cwad ATV, torwyr prysgoed, peiriannau naddu pren, taenu plaladdwyr a gyrru tractorau.

Byddwch hefyd yn cael cyfle i weithio ar brosiectau cymunedol, a gweithgareddau eraill, yn ogystal â'ch prosiect unigol eich hun, wrth weithio tuag at gwblhau Bagloriaeth Cymru Uwch.