Roedd geiriau’r cyn-fyfyriwr Lauren Baker yn llenwi Ysgol Fusnes Coleg Cambria Llaneurgain ddydd Gwener, wrth iddi hi ymuno â hyd at 50 o ddysgwyr sydd wedi cwblhau cymwysterau Cenedlaethol Uwch a phroffesiynol ar gyfer y seremoni raddio yn y Ganolfan Brifysgol eleni.
Gwnaeth Lauren gwblhau cynllun prentisiaeth Airbus gan ymgymryd â’r BSc mewn Rheoli Busnes Cymhwysol yn Cambria ym mis Rhagfyr, ac erbyn hyn mae hi’n Gynllunydd Tactegol ar y Tîm Strwythurau Cynllunio Rhaglen Eil Sengl yn ffatri gwneud adenydd y sefydliad awyrofod blaenllaw ym Mrychdyn.
Roedd Lauren yn clodfori’r coleg am ei gefnogaeth ac yn llongyfarch y grwpiau addysg uwch am eu “dyfalbarhad” a’u “gwytnwch”.
“Er bod addysg bellach ac uwch yn heriol, mae Coleg Cambria yn eich galluogi chi i sylweddoli ei bod hi’n bosib cyflawni eich nodau a llwyddo,” meddai Lauren.
“Wrth siarad â ffrindiau a chydweithwyr sydd heb fynd i’r coleg, rydych chi’n sylweddoli eich bod chi ddim yn cael y lefel yma o gymorth mewn unrhyw le arall.
“Mae gan y staff a’u staff addysgu lefel uchel iawn o ymgysylltu ac mae hynny’n cynyddu eu potensial i lwyddo yn anochel. Mi wnaeth llawer ohonoch chi dynnu sylw at hyn, ac mi wnes i roi gwybod am hyn pan oeddwn i’n fyfyriwr arweiniol ar gyfer y coleg yn yr adolygiad QAA – cyfle gwych arall i mi.”
Ychwanegodd hi: “Dwi mor ddiolchgar fy mod i wedi cael y cyfle yma i’ch llongyfarch chi i gyd a dwi’n gobeithio fy mod i wedi rhoi ychydig o gyngor i chi a fydd o gymorth i chi yn y dyfodol a’ch ysbrydoli chi i gredu eich bod chi’n gallu gwneud unrhyw beth rydych chi’n dymuno ei wneud.”
Sue Price, Pennaeth Cambria oedd yn agor y seremoni, roedd hi’n clodfori’r dysgwyr ac yn diolch eu teulu a’u ffrindiau sydd wedi bod yn gefn iddyn nhw ar eu taith i lwyddiant academaidd.
“Dyma’r ffordd berffaith i’ch helpu chi i ddathlu eich cyflawniadau, dwi’n gobeithio eich bod chi’n cael amser arbennig” ychwanegodd hi.
Ymysg y cyrsiau a’r rhaglenni a gafodd eu cynrychioli ar y dydd oedd Diploma Proffesiynol Lefel 4 AAT mewn Cyfrifeg, Tystysgrif Lefel 4 Sefydliad Arwain a Rheoli (ILM) mewn Arwain a Rheoli, Diploma Lefel 4 ILM mewn Arwain a Rheoli, a Diploma Lefel 5 mewn Arwain a Rheoli.
Cafodd y myfyrwyr sydd wedi cyflawni’r HNC Lefel 4 mewn Adeiladu, Yr Amgylchedd Adeiledig, HND mewn Adeiladu a’r Amgylched Adeiledig, Diploma Cyswllt Lefel 5 CIPD mewn Rheoli Pobl, Tystysgrif Genedlaethol Uwch mewn Rheolaeth Anifeiliaid, a HND Lefel 5 mewn Rheolaeth Anifeiliaid eu dathlu hefyd.
Dywedodd Emma Hurst, Deon Addysgu Uwch a Mynediad i AU yn Cambria: “Dwi’n siŵr eich bod chi i gyd mor falch heddiw, ac rydyn ni’n rhannu’r balchder yma gyda chi.
“Rydyn ni eisiau diolch i’n hoff staff am gefnogi ein dysgwyr ar hyd y ffordd, ac i’n llywodraethwyr hefyd. Llongyfarchiadau i’n holl ddysgwyr ni sy’n dathlu heddiw, mi ddylech chi fod yn falch iawn o’ch cyflawniadau.”
Dilynwch yr hashnod #CUCCelebration a @colegcambriacym ar gyfryngau cymdeithasol.
Gallwch chi wylio fideo o’r seremoni raddio yma: CUC Graduation Video – YouTube
Ar gyfer y newyddion a’r wybodaeth ddiweddaraf gan Goleg Cambria, ewch i https://www.cambria.ac.uk.
