Mae Coleg Cambria wedi datgelu’r cyfleuster 360 gradd o’r radd flaenaf ar ei safle yng Nglannau Dyfrdwy, gan nodi carreg filltir wirioneddol yn ei ymrwymiad i arloesedd digidol, cynhwysiant a chymorth myfyrwyr.

Mae hygyrchedd wrth wraidd yr ystafell drochol yma, ac mae’n profi’n effeithiol iawn i ddysgwyr sydd ag Anghenion Dysgu Ychwanegol (ADY), staff a myfyrwyr niwroamrywiol.

Mae’r cyfleuster yn cynnig amgylcheddau synhwyrol addasadwy a’r gallu i greu senarios ymlaciol a heddychlon – o gefn gwlad distaw i daith i lan y môr – gan gefnogi rheoleiddio emosiynol, canolbwyntio’n well a llesiant cyffredinol ochr yn ochr â datblygiad academaidd.

Dywedodd Lizzie Stevens, Cyfarwyddwr Cynhwysiant a Chynnydd: “Fel rhan o’n gweledigaeth pum mlynedd strategol, rydyn ni’n gyrru arloesedd digidol ar draws y coleg.

“Mae’r cyfleuster yma yn bwynt gwerthu unigol anferth i ni ac mae wir yn ein gosod ni ar flaen y gweddill mewn addysg bellach. Mae’n rhoi cyfle i’r dysgwyr gamu i amgylcheddau realistig, datblygu sgiliau ymarferol yn ddiogel, a hyd yn oed gymryd perchnogaeth drwy ein helpu i lunio a chreu senarios ar gyfer y dyfodol.

“Mae’r cyfleuster wedi’i ariannu drwy Gyllid cyfalaf ADY ac mae’n cael ei ddefnyddio i gefnogi dysgwyr sydd ag anghenion dysgu ychwanegol. Rydyn ni angen defnyddio technolegau newydd ac sy’n dod i’r amlwg i gael gwared ar rwystrau mae ein dysgwyr yn eu hwynebu.

“Mae’r cyfleuster cynhwysol yn darparu profiad synhwyraidd a allai gyflwyno profiadau dysgwyr arwyddocaol a phwrpasol.”

Y tu hwnt i’w fanteision llesiant, mae’r ardal sy’n torri tir newydd yn galluogi dysgwyr a darlithwyr i greu senarios realistig drwy bwyso botwm, o wardiau ysbyty i safleoedd trosedd i arenâu E-chwaraeon byw a llwyfannau gemau rhyngweithiol.

Yn wahanol i ystafelloedd drochol eraill, mae’r ystafell ddosbarth yn cynnwys pedair wal gyda thaflunydd yn ogystal â llawr rhyngweithiol, gan greu profiad 360 gradd sy’n amgylchynu dysgwyr yn gyfan gwbl.

Mae’r dechnoleg yn gallu cyrchu miloedd o amgylcheddau sy’n bodoli’n barod neu alluogi staff a myfyrwyr i greu eu hamgylchedd eu hunain, gan deilwra senarios i bynciau a sgiliau penodol.

Dywedodd Sean Regan, Cyfarwyddwr Cwricwlwm Astudiaethau Technegol yng Nglannau Dyfrdwy, fod angen i’r cyfleuster adlewyrchu symudiad i ffwrdd o addysgu ‘un maint i bawb’.

“Nod yr ystafell ddosbarth drochol yma ydy dod â dysgu yn fyw,” meddai.

“Dydy pob myfyriwr ddim yn ffynnu drwy eistedd wrth ddesg yn gwrando ar ddarlithydd, a dim dyna ydy ein nod ni. Rydyn ni wedi ymrwymo i greu profiadau rhyngweithiol, diddorol a hygyrch sy’n gweithio i’r holl fyfyrwyr, gan gynnwys y rhai niwroamrywiol.”

Mae’r ystafell drochol yn cael ei defnyddio’n aml iawn gan dîm llesiant y coleg, sydd wedi magu dull arloesol i’w defnyddio. Maen nhw’n cyflwyno sesiynau ymlacio rhyngweithiol, gweithgareddau llesiant a phrofiadau synhwyraidd dan arweiniad sy’n helpu dysgwyr i adeiladu gwytnwch, rheoli gorbryder a theimlo’n fwy hyderus yn eu hastudiaethau.

Mae adrannau gan gynnwys Y Cyfryngau Creadigol, Iechyd a Gofal Cymdeithasol, TG, Technoleg Ddigidol, Chwaraeon, Gofal Plant ac E-chwaraeon hefyd yn defnyddio’r cyfleuster. Mae cynlluniau yn eu lle i sicrhau bod y cyfleuster yn cael ei ddefnyddio’n rhagor ac i ddatblygu rhaglenni pwrpasol sy’n cynyddu ei botensial ar draws y coleg.

Dywedodd Andy Mackie, Rheolwr Seilwaith, fod y system yn mynd ymhell y tu hwnt i dafluniad gweledol.

“Rydyn ni’n gallu cynnwys sain a hyd yn oed arogleuon i ddyfnhau realaeth pob senario,” meddai.

“Mae gennym ni filoedd o olygfeydd wrth law, ac rydyn ni’n medru creu rhai ein hunain hefyd, wedi’u teilwra i wahanol bynciau a chanlyniadau dysgu.

“Rydyn ni’n medru rheoli hyn gyda thabled. Boed yn ward ysbyty efelychiedig ar gyfer myfyrwyr Iechyd a Gofal Cymdeithasol, lleoliad trosedd ar gyfer dysgwyr fforensig, neu amgylchedd trochol ar gyfer dylunio gemau, gallwn ni adeiladu byd cyfan o amgylch ein myfyrwyr ac addysgu ystod eang o sgiliau mewn ffordd ddiogel a rheoledig.”

Mae myfyrwyr E-chwaraeon wedi bod ymhlith y rhai cyntaf i fanteisio ar y dechnoleg newydd, gan ei defnyddio ar gyfer gweithdai dylunio gemau, archwilio materion moesegol mewn gemau cystadleuol, a pharatoi ar gyfer cystadlaethau mawr drwy ail-greu awyrgylch arena byw.

Dywedodd y darlithydd e-chwaraeon Lauren Crofts fod yr effaith wedi bod yn amlwg yn syth: “Mae hi wedi bod yn wych i’n dysgwyr. Rydyn ni wedi gallu ail-greu’r teimlad o fod mewn arena fyw, sy’n baratoad amhrisiadwy ar gyfer ein cystadlaethau blynyddol. Rydyn ni’n gallu efelychu amgylcheddau sylwebu a chreu sesiynau rhyngweithiol iawn o amgylch dylunio a moeseg gemau.

“Mae’r elfen drochol yn gwneud dysgu’n fwy cydweithredol, yn fwy ymarferol ac yn llawer mwy diddorol.”

Dywedodd Christopher Moran, dysgwr Lefel 3 mewn E-chwaraeon, o Bentre Helygain, fod y profiad wedi newid y ffordd y mae’n mynd ati i astudio.

“Mae mor wahanol, mae’n eich galluogi chi i gydweithio’n rhagor yn hytrach na dysgu ar eich pen eich hun,” meddai.

“Mae’n ffordd wych o ddysgu ac yn andros o ddiddorol – dwi heb weld dim byd tebyg o’r blaen.”

Ewch i www.cambria.ac.uk i weld y newyddion a’r wybodaeth ddiweddaraf gan Goleg Cambria.