Cyflawnodd Tom Groves raddau A Safon Uwch mewn Mathemateg a Ffiseg, A ym Magloriaeth Cymru ac C mewn Economeg yn dilyn dwy flynedd lwyddiannus yng Nghanolfan Chweched Dosbarth Glannau Dyfrdwy.

Mae cyn-ddisgybl Coleg Myddelton bellach yn penderfynu rhwng prifysgolion Manceinion a Lerpwl, lle mae’n bwriadu astudio Peirianneg Sifil cyn dilyn gyrfa yn y sector.

I’w fam Leanne, mae ei gyflawniadau’n arbennig o werthfawr o ystyried bod ganddi amheuon i ddechrau ynghylch Tom yn symud i amgylchedd coleg llawer mwy.

“Roeddwn i’n bryderus amdano’n dod i goleg mor fawr, ond roedd e wrth ei fodd o’r diwrnod cyntaf,” meddai hi.

“Dyma oedd y cam iawn iddo; mae wedi ffynnu’n academaidd ac fel person. Mae’n llawn ffocws ac yn awyddus i gyrraedd lle mae am fod, ac rwy’n hynod falch. Mae wedi dod mor bell mewn dim ond dwy flynedd.”

Dywedodd Tom, sydd hefyd yn chwarae criced i glwb criced dynion Llanelwy, fod casglu ei ganlyniadau wedi dod â chymysgedd o hapusrwydd a rhyddhad.

“Rydw i mor hapus ac yn edrych ymlaen yn fawr at y dyfodol,” meddai.

“Roedd llawer o ddisgwyliad cyn y diwrnod, felly roedd yn gymysgedd o hapusrwydd a rhyddhad pan ges i’r canlyniadau.

“Rydw i wedi mwynhau fy amser yn Chweched Glannau Dyfrdwy ac wedi cael cymaint o gefnogaeth dros y ddwy flynedd ddiwethaf. Mae wedi rhoi’r hyder i mi gymryd y cam nesaf.”

Llongyfarchodd Mim Riddell, Pennaeth Chweched Glannau Dyfrdwy a Phennaeth Cynorthwyol Astudiaethau Academaidd yng Ngholeg Cambria, Tom ar ei gyflawniadau.

“Mae Tom wedi gweithio’n anhygoel o galed ac wedi dangos ffocws ac agwedd benderfynol aruthrol drwy gydol ei amser gyda ni,” meddai.

“Mae ei ganlyniadau’n gwbl haeddiannol, ac mae wedi bod yn hyfryd ei weld yn datblygu’n academaidd ac yn bersonol. Mae peirianneg yn faes cyffrous a heriol ac nid oes gennym unrhyw amheuaeth bod dyfodol disglair o’i flaen gan Tom.”