Mae Matthew Turner, sy’n astudio e-chwaraeon Lefel 3 yng Ngholeg Cambria Glannau Dyfrdwy, wedi cael ei ddewis ar gyfer carfan Rygbi’r Gynghrair Cadair Olwyn Cymru, ochr yn ochr â’i dad, Martin.
Maen nhw’n un o ddau bâr o dad a mab yn y tîm.
Bydd Matthew yn dathlu ei ben-blwydd pan fydd Cymru’n wynebu Iwerddon, ar ôl iddyn nhw ddechrau eu hymgyrch Cwpan y Byd yn erbyn Lloegr.
“Dydy hyn ddim yn rhywbeth sy’n digwydd bob dydd – cael y cyfle i chwarae yng Nghwpan y Byd wrth fod yn dy arddegau – felly dwi’n teimlo’n ffodus iawn,” meddai.
“Dwi mor gyffrous. Mae wedi bod yn freuddwyd gen i gynrychioli Cymru dramor ers i mi gael fy nghap cyntaf yn yr Alban yn gynharach eleni.
“Mae gwneud hynny ochr yn ochr â fy nhad, a dathlu fy mhen-blwydd yno, yn ei wneud hyd yn oed yn fwy arbennig.”
“Rydyn ni’n gwybod bod rhai timau gwych, gan gynnwys Lloegr a Ffrainc, ond mae gennym ni garfan ardderchog ac rydyn ni’n mynd allan yno i ddangos yr hyn rydyn ni’n gallu ei wneud.
“Gall unrhyw beth ddigwydd yn y gamp hon. Rydyn ni’n mynd i bob gêm gyda’r gred ein bod ni’n gallu ennill, oherwydd mae’n rhaid cael y meddylfryd hwnnw. Rydyn ni am wneud Cymru’n falch.”
Mae Matthew yn gyn-chwaraewr rygbi’r undeb; dechreuodd chwarae rygbi’r gynghrair mewn cadair olwyn yn 13 oed, ar ôl mynd i sesiwn flasu yn dilyn y Cwpan y Byd blaenorol.
Mae’n un o chwaraewyr y garfan sydd heb anabledd corfforol; mae hefyd yn cynrychioli North Wales Crusaders ac mae ganddo wreiddiau teuluol Cymreig yn y Cymoedd.
Dywedodd prif hyfforddwr Cymru, Alan Caron: “Mae Matthew yn enghraifft wych o’r hyn y gall rygbi’r gynghrair cadair olwyn ei gynnig i bobl ifanc. Mae cael ei ddewis ar gyfer Cwpan y Byd yn 16 oed yn unig, a rhannu’r profiad hwnnw gyda’i dad, yn rhywbeth arbennig iawn.
“Mae ganddo gyflymder gwych, brwdfrydedd ac awydd gwirioneddol i wella, ac mae eisoes wedi dangos beth y gall ei gyfrannu at y garfan hon.”
“Mae hefyd yn stori wych i’r gamp yng Nghymru, yn dangos bod rygbi’r gynghrair cadair olwyn yn gêm i bawb, yn dod â theuluoedd at ei gilydd ac yn rhoi cyfleoedd i chwaraewyr gynrychioli eu gwlad ar y llwyfan mwyaf. Dylai Matthew a Martin fod yn hynod falch o’r hyn maen nhw wedi’i gyflawni i gyrraedd yma.”
Y tu hwnt i rygbi, mae Matthew yn mwynhau Rocket League ac yn gobeithio cystadlu yn E-chwaraeon wrth ddilyn gyrfa mewn gemau.
Dywedodd Lauren Crofts, Darlithydd E-chwaraeon ac Arweinydd Rhaglen E-chwaraeon Addysg Uwch: “Rydyn ni’n hynod falch yma yn yr Adran E-chwaraeon o weld Matt yn cael ei ddewis i gynrychioli Cymru yng Nghwpan y Byd Cadair Olwyn.”
“Mae ei ymroddiad, ei ddisgyblaeth a’i angerdd dros y gamp yn wirioneddol ysbrydoledig i bawb yng Ngholeg Cambria. Mae cyrraedd y lefel hon o gystadlu yn gamp enfawr, ac rydyn ni’n gwybod y bydd yn cynrychioli Cymru a’n cymuned gyda balchder. Byddwn ni i gyd yn ei gefnogi.”
Cafodd paratoadau’r garfan hwb pan gyrhaeddodd yr ymgyrch codi arian ‘10,000 x £1 = CYMRU’ ei tharged, ar ôl i’r tîm golli’r noddwr oedd ar flaen eu crysau.
Ychwanegodd Matthew: “Mae’n anhygoel bod cymaint o bobl wedi ein cefnogi ni. Rydyn ni’n hyderus, yn gyffrous ac yn methu aros i ddechrau.
“Bydd cael ‘CYMRU’ ar ein crysau yn gwneud y profiad hyd yn oed yn fwy arbennig. Rydyn ni am wneud pawb yn falch.”
