Bydd Oscar Taylor, sy’n dyheu am fod yn feddyg, yn astudio Meddygaeth yng Ngholeg Prifysgol Llundain (UCL), a Mikey Knapp yn mynd i Brifysgol Leeds i astudio Busnes Rhyngwladol a Chyllid.
Enillodd Mikey raddau A mewn Mathemateg a Busnes, gradd A ym Magloriaeth Cymru a gradd B mewn Economeg, gan sicrhau ei le yn Leeds yn dilyn cyfnod llwyddiannus o ddwy flynedd yn Chweched Glannau Dyfrdwy.
Cafodd Oscar, 18, o Ewlo, gynigion i astudio Meddygaeth gan bedair o ysgolion meddygol mwyaf cystadleuol y DU – UCL, Prifysgol Newcastle, Prifysgol Caerdydd a Phrifysgol Bryste. Erbyn hyn mae ar fin dechrau ar y cwrs Meddygaeth (MBBS iBSc) yn UCL.
Astudiodd y cyn-ddisgybl o Ysgol Uwchradd Elfed Safon Uwch mewn Bioleg, Cemeg a Mathemateg ochr yn ochr â Bagloriaeth Sgiliau Uwch Cymru, ac mae’n gobeithio dilyn gyrfa yn y GIG yn y pen draw.
“Mae cymaint o feysydd diddorol ym myd meddygaeth,” meddai Oscar.
“Ar hyn o bryd, mae gen i ddiddordeb arbennig mewn pediatreg ac orthopedeg oherwydd y profiad gwaith rydw i wedi’i gwblhau, ond rydw i’n gyffrous i weld pa lwybr y byddai’n ei ddewis yn y maes.”
Roedd Oscar wedi sefydlu Cymdeithas Feddygol Glannau Dyfrdwy, gan ddod â dysgwyr â diddordeb mewn meddygaeth, deintyddiaeth a gyrfaoedd gofal iechyd eraill at ei gilydd.
Roedd yn canmol y cymorth a gafodd gan Chweched Glannau Dyfrdwy, yn enwedig yn ystod y broses heriol o wneud cais i ysgolion meddygol.
“Roedd ein Pennaeth Chweched, Mim Riddell, yn wych. Aeth ati i drefnu sesiynau cyfweliad ffug mewn partneriaeth â Chweched Iâl ac roedd ganddi wybodaeth helaeth am y broses o wneud cais o’r dechrau i’r diwedd,” meddai.
“Trwy Goleg Cambria cefais fy nghyflwyno i’r Rhaglen Seren, sydd wedi arwain at gyfleoedd gan gynnwys Rhaglen Feddygol Wrecsam a chyfle i gymryd rhan mewn ysgol haf yn Ysgol Feddygaeth Prifysgol Caerdydd. Roedd y profiadau hyn wedi gwella fy nghais ac wedi fy helpu i fagu hyder.”
Bu Mim Riddell, Pennaeth Chweched Glannau Dyfrdwy ac a Dirprwy Bennaeth Astudiaethau Academaidd yng Ngholeg Cambria, yn llongyfarch y dysgwyr ar draws y ganolfan.
“Mae’r canlyniadau hyn yn dod o ganlyniad i lawer iawn o waith caled, ymrwymiad ac ymroddiad gan ein myfyrwyr, ac rydym yn eithriadol o falch ohonynt,” meddai.
“Ar draws Chweched Glannau Dyfrdwy mae myfyrwyr sy’n symud ymlaen i brifysgolion, prentisiaethau a gyrfaoedd mewn ystod eang o sectorau. Dymunwn y gorau i bob un ohonyn nhw ar gyfer y dyfodol.”
Ewch i www.cambria.ac.uk am y newyddion a’r wybodaeth ddiweddaraf gan Goleg Cambria.
