Gan adeiladu ar gydweithrediad sydd wedi ymgysylltu â mwy na 1,500 o bobl drwy hyfforddi, cystadlaethau a digwyddiadau cymunedol ers 2023, cyflwynodd y rhaglen ddiweddaraf o weithgareddau ar safle Iâl y coleg yn Wrecsam hyd yn oed mwy o blant i’r gamp wrth ddatblygu’r genhedlaeth nesaf o hyfforddwyr, gwirfoddolwyr ac arweinwyr chwaraeon.
Dywedodd Aaron Beech, Swyddog Datblygu Rhanbarthol Gogledd Cymru ar gyfer Tenis Bwrdd Cymru, fod y bartneriaeth yn parhau i adeiladu momentwm.
“Dros yr ychydig fisoedd diwethaf, rydyn ni wedi gweld yn uniongyrchol yr effaith gadarnhaol y gall tenis bwrdd ei chael ar bobl ifanc, boed hynny drwy gyfranogiad, cystadleuaeth, arweinyddiaeth neu ddim ond meithrin hyder a gwneud ffrindiau newydd,” meddai.
“Mae’r gefnogaeth gan Goleg Cambria, Wrecsam Egnïol, ysgolion lleol a grwpiau cymunedol wedi bod yn wych. Gyda’n gilydd rydyn ni wedi creu llwybr sy’n caniatáu i blant roi cynnig ar y gamp am y tro cyntaf, datblygu eu sgiliau a pharhau i chwarae yn y tymor hir.
“Rydyn ni newydd gwblhau ein sesiynau olaf yn Iâl ar gyfer yr haf ac rydyn ni’n edrych ymlaen at ddychwelyd ym mis Medi yn barod, i adeiladu ar y momentwm rydyn ni wedi’i greu.”
Ymhlith uchafbwyntiau’r rhaglen roedd ymweliad ag Ysgol Gynradd Bwlchgwyn, lle cymerodd mwy na 100 o ddisgyblion ran mewn sesiynau tenis bwrdd hwyliog a diddorol a oedd yn canolbwyntio ar gydlynu, hyder a sgiliau symud sylfaenol.
Fe waeth llwyddiant yr ymweliad ymestyn y tu hwnt i’r ystafell ddosbarth, gyda Sgowtiaid a Chybiaid Bwlchgwyn yn mynd i’r coleg yn ddiweddarach am sesiwn blasu pellach, gan gryfhau cysylltiadau cymunedol a rhoi cyfle i hyd yn oed mwy o bobl ifanc brofi’r gamp.
Mae myfyrwyr yng Ngholeg Cambria hefyd wedi chwarae rhan flaenllaw yn y fenter. Cwblhaodd dysgwyr Chwaraeon Lefel 2 Gwrs Ysgogydd Tenis Bwrdd, gan eu cyfarparu â sgiliau hyfforddi, cyfathrebu ac arwain cyn eu rhoi ar waith mewn Gŵyl Tenis Bwrdd Ysgol Gynradd.
Cynlluniodd a chyflwynodd y myfyrwyr eu gorsafoedd gweithgaredd eu hunain, gan arwain cyfranogwyr trwy gyfres o heriau a gemau mewn amgylchedd hwyliog, cynhwysol ac egnïol a oedd yn annog cyfranogiad a mwynhad.
Yn y cyfamser, cefnogodd dysgwyr Chwaraeon Lefel 3 Bencampwriaethau Tenis Bwrdd blynyddol Ysgolion Cynradd, gan wirfoddoli drwy gydol y digwyddiad ac ennill profiad ymarferol mewn sgorio, gweinyddu, rheoli digwyddiadau a chyflwyno cystadlaethau.
Datblygiad llwyddiannus arall oedd cyflwyno rhaglen ddechreuwyr wyth wythnos, a gafodd ei awgrymu’n wreiddiol gan Wrecsam Egnïol. Cyflwynodd y cwrs strwythuredig sgiliau allweddol i blant gan gynnwys gafael, symudiad, serfio a ralio, gan helpu llawer o gyfranogwyr i symud ymlaen i glybiau lleol a sesiynau hyfforddi rheolaidd.
Dywedodd Sally Jones, Cyfarwyddwr Cwricwlwm Busnes, Celfyddydau Perfformio, Gwasanaethau Cyhoeddus a Chwaraeon yng Ngholeg Cambria: “Mae’r bartneriaeth â Thenis Bwrdd Cymru yn parhau i greu cyfleoedd gwych i’n dysgwyr wrth wneud gwahaniaeth gwirioneddol yn y gymuned.
“Mae ein myfyrwyr wedi ennill profiad arwain a hyfforddi amhrisiadwy, tra bod cannoedd o bobl ifanc wedi cael eu cyflwyno i chwaraeon sy’n hyrwyddo gweithgaredd corfforol, hyder, gwaith tîm a llesiant.
