Mae’r hwb o’r radd flaenaf wedi’i enwi’r Adeilad Cymunedol neu Gyhoeddus Orau yng Ngwobrau Rhagoriaeth Adeiladu LABC, gan gydnabod cyflawniad rhagorol mewn dylunio, cynaliadwyedd ac ansawdd adeiladu.
Wedi’i gefnogi gan dros £5.9 miliwn gan Raglen Cymunedau Cynaliadwy ar gyfer Dysgu Llywodraeth Cymru, cafodd yr adeilad ei adeiladu gan gwmni Read Construction o Wrecsam a chafodd ei ddylunio i gefnogi datblygiadau mewn astudiaethau’r tir.
Mae cyfleusterau’n cynnwys ystafelloedd dosbarth, labordai, llyfrgell, mannau cyfarfod, siop goffi, wâl ddringo, canolfan AU a hwb llesiant.
Canmolodd beirniaid yr LABC y datblygiad, gan ddweud: “Mae’r prosiect yma yn enghraifft o ddylunio cynaliadwy ac adeiladu cydweithredol i greu adeilad carbon-niwtral sy’n integreiddio mannau addysgol â chyfleusterau llesiant a hamdden.
“Trwy inswleiddio gwell, aerglosrwydd a llygad craff am fanylion, cyflawnodd y prosiect berfformiadau thermol uwch gan arwain at ostyngiad sylweddol yn y defnydd o ynni cynradd.”
Gwnaeth Pennaeth Llysfasi Elin Roberts llongyfarch tîm y prosiect am y wobr a’u partneriaeth barhaus.
“Rydyn ni’n hynod o falch o weld yr Hwb Arloesi’n cael ei gydnabod ar lefel genedlaethol,” meddai Elin.
“Hoffwn longyfarch Read Construction, a phawb a oedd yn rhan o ddarparu cyfleuster mor rhagorol. O safbwynt y coleg, mae’r adeilad yma yn cynrychioli ein huchelgais ar gyfer dysgwyr, ein hymrwymiad i gynaliadwyedd, a’n penderfyniad i ddarparu amgylcheddau ysbrydoledig sy’n cefnogi llwyddiant academaidd a llesiant.”
Ychwanegodd Alex Evans, Pennaeth Ystadau a Chyfleusterau: “Mae Coleg Cambria yn falch o gael cydnabyddiaeth i’r Hwb Arloesi ar lefel genedlaethol yng Ngwobrau Rhagoriaeth Adeiladu’r LABC.
“Wedi’i gyflwyno mewn partneriaeth â TACP Architects a Read Construction a’i gefnogi gan raglen Cymunedau Cynaliadwy ar gyfer Dysgu Llywodraeth Cymru, mae’r adeilad wedi’i adeiladu i safonau Carbon Sero Net.
“Gyda phwmp gwres o’r aer, paneli solar, systemau rheoli adeiladau deallus ac adeiladu pren modiwlaidd, mae’r Hwb Arloesi yn cefnogi uchelgais y coleg i ddadgarboneiddio ei ystâd. Mae’r cyfleuster wedi adfywio addysg ar safle Llysfasi yn Rhuthun, gan ddarparu mannau dysgu modern o ansawdd uchel sy’n cyfuno’n ddi-dor â’r amgylchedd lleol.”
Gan adeiladu ar y llwyddiant hwn, mae Read Construction wedi cael eu penodi i gyflwyno datblygiad llety 50 ystafell wely newydd i’r myfyrwyr yn Llysfasi.
Yn dilyn cymeradwyaeth gynllunio a chwblhau’r holl asesiadau amgylcheddol, mae timau adeiladu bellach ar y safle yn gosod y sylfeini ar gyfer y prosiect gwerth miliynau o bunnoedd.
Wedi’i ddylunio gan TACP Architects, bydd yr adeilad yn darparu mannau byw cyfoes o ansawdd uchel i fyfyrwyr, gan gynnwys ystafelloedd gwely en-suite, mannau cymdeithasu a pharthau cymunedol wedi’u cynllunio i feithrin ymdeimlad cadarn o gymuned.
Dywedodd Paul Izzard, Rheolwr Safle Adeiladu Read ar gyfer yr Hwb Arloesi: “Ar ôl cyflwyno’r Hwb Arloesi, rydyn ni’n deall pa mor bwysig ydy creu adeiladau sy’n gwella profiadau’r myfyrwyr yn wirioneddol, a bydd y llety yma yn cefnogi dysgwyr yn ystod eu hastudiaethau a thu hwnt.
Rydyn ni wrth ein bodd ein bod ni wedi ennill y wobr a diolch i Goleg Cambria am eu cefnogaeth.”
Ewch i www.cambria.ac.uk i weld y newyddion a’r wybodaeth ddiweddaraf gan Goleg Cambria.
I weld rhagor am Read Construction, ewch i’r wefan: www.readconstruction.co.uk.
