Mae hyd at 100 o bobl ifanc yn cymryd rhan ar draws safleoedd Glannau Dyfrdwy a Wrecsam y coleg yr haf hwn, gan gynnwys 60 yng Nglannau Dyfrdwy yn unig – y nifer uchaf hyd yn hyn.
Wedi’i gynllunio ar gyfer myfyrwyr Blwyddyn 11 sy’n gadael yr ysgol, mae’r rhaglen saith wythnos yn helpu pobl ifanc i wneud y newid o’r ysgol i addysg bellach, prentisiaethau neu gyflogaeth. Mae wedi’i hanelu’n benodol at y rhai a allai fod yn ansicr ynghylch eu camau nesaf neu a fyddai’n elwa o gefnogaeth ychwanegol cyn dechrau cam nesaf eu haddysg neu eu gyrfa.
Mae dysgwyr yn mynd tridiau’r wythnos, gan gyfuno gweithgareddau yn yr ystafell ddosbarth, dysgu o bell ac ymweliadau addysgol mewn amgylchedd hamddenol, anffurfiol sy’n canolbwyntio ar feithrin hyder, llesiant, gwaith tîm a sgiliau cyflogadwyedd.
Maent hefyd yn cael lwfans hyfforddi wythnosol o rhwng £42 a £60, yn dibynnu ar eu cynllun dysgu a datblygu unigol, cyn y dewis o symud ymlaen i raglen ehangach Twf Swyddi Cymru+, lle mae llawer yn symud i brentisiaethau neu gyflogaeth llawn amser.
Dywedodd Claire Howells, Cyfarwyddwr Cwricwlwm Twf Swyddi Cymru+ yng Ngholeg Cambria Glannau Dyfrdwy, fod yr ysgol haf sydd wedi’i hailwampio, wedi tyfu’n sylweddol yn ystod y blynyddoedd diwethaf wrth i fwy o bobl ifanc geisio arweiniad ychwanegol ar ôl gadael yr ysgol.
“Rydyn ni’n gwybod y gall gorffen Blwyddyn 11 fod yn gyfnod cyffrous ond hefyd yn ansicr,” meddai.
“Mae rhai dysgwyr eisoes yn gwybod ble maen nhw am fynd nesaf, tra bod eraill yn dal i archwilio eu hopsiynau. Mae’r rhaglen yma’n rhoi’r amser, yr anogaeth a’r gefnogaeth ymarferol iddyn nhw i feithrin hyder, datblygu sgiliau newydd a gwneud penderfyniadau gwybodus am eu dyfodol.
“Rydyn ni wedi croesawu 60 o ddysgwyr, y nifer uchaf erioed, yng Nglannau Dyfrdwy yr haf hwn, sy’n adlewyrchu’r galw am y math hwn o gefnogaeth a llwyddiant y rhaglen.
“Mae popeth a wnawn ni wedi’i gynllunio i’w paratoi ar gyfer y bennod nesaf yn eu bywydau mewn amgylchedd cadarnhaol, pleserus a chefnogol.”
Mae’r gweithgareddau’n cynnwys sesiynau Cambria Heini, gweithdai iechyd a llesiant, ymweliadau â safleoedd ac atyniadau’r Ymddiriedolaeth Genedlaethol gan gynnwys Alton Towers, ochr yn ochr â sgyrsiau gan siaradwyr gwadd fel yr arbenigwr gwaith ieuenctid Simeon Earnshaw, sy’n gweithio gyda phobl ifanc ledled Cymru ar fentrau ymgysylltu cymunedol ac atal troseddu.
Mae dysgu o bell hefyd yn annog cyfranogwyr i dreulio amser yn yr awyr agored trwy weithgareddau fel ffotograffiaeth ac archwilio natur, gan helpu i hyrwyddo iechyd meddwl cadarnhaol ochr yn ochr â dysgu annibynnol.
Mae’r ysgol haf yn adeiladu ar lwyddiant parhaus rhaglen Twf Swyddi Cymru+ Coleg Cambria, sydd wedi ehangu’n gyflym dros y ddwy flynedd ddiwethaf ac sydd bellach yn cefnogi mwy na 100 o ddysgwyr ledled gogledd-ddwyrain Cymru.
Dywedodd David Garratt, Cyfarwyddwr Cwricwlwm Twf Swyddi Cymru+ ar safle Iâl y coleg yn Wrecsam: “Mae’r ysgol haf yn rhoi cyfle gwerthfawr i bobl ifanc ddatblygu hyder cyn cymryd eu cam nesaf, boed hynny’n Safon Uwch, cwrs galwedigaethol, prentisiaeth neu gyflogaeth.
“Mae wedi dod yn rhan bwysig o raglen ehangach Twf Swyddi Cymru+, ac rydyn ni wrth ein bodd yn cefnogi mwy o ddysgwyr nag erioed o’r blaen wrth iddynt baratoi ar gyfer dyfodol cyffrous.”
Darganfyddwch ragor ar https://cambria.ac.uk/coleg-16-18/meysydd-pwnc-coleg-16-18/twf-swyddi-cymru-plws/?lang=cy neu anfonwch e-bost at TSCPlws@cambria.ac.uk.
